Осум кандидати и кандидатки ќе се натпреваруваат на претседателските избори во Словенија што ќе се одржат на 22. октомври, а првпат досега меѓу нив има повеќе жени отколку мажи.
Рокот за предавање на кандидатурите истече ноќеска на полноќ, а листата на кандидатурите е заклучена.
Актуелниот претседател Борут Пахор се смета за апсолутен фаворит, а единствена дилема е дали ќе победи во првиот или ќе мора да оди и во втор круг.
Покрај Пахор, кандидати се Сузана Лара Краусе од Словенечката народна партија (СЛС), Људмила Новак претседателка на опозициската Нова Словенија (НСЛ), европарламентарката Романа Томц од Словенечката демократска партија (СДС), актуелната министерка за образование Маја Маковец Бренчич е кандидат на Партијата на модерниот центар (СМЦ) и пензионираната учителка Ангелица Ликович која има поддршка од конзервативната вонпарламентарна партија Глас за децата и семејството.
Меѓу конкурентите на актуелниот претседател Пахор се и двајца локални политичари, градоначалникот на Копар, Борис Поповиќ и градоначалникот на Камник, Марјан Шарец.