Жидас Даскаловски, Пенчо Кузев, Марија Ристевски и Татјана Атанасовска Гроздановска со онлајн петиција од премиерот Никола Груевски бараат да стори се што е во неговите можности за да се спречи прекумерното аерозагадување на Скопје и сериозните импликации што тоа ги предизвикува врз граѓаните.
Бидејќи досега ниедна институција не реагирала и се прогласиле за ненадлежни, го повикуваат лично Груевски да преземе нешто.
-Почитуван премиере, загадувањето на животната средина во населбите Аеродром и Гази Баба е алармантно и бара ваша итна реакција без одлагање. Очекуваме од вас да им наложите на ресорните министерства, да го лоцираат загадувачот веднаш и да изречат санкција во согласност со позитивните прописи во Република Македонија. Не дозволувајте главниот град да постане втор Велес. Товарот на целото општество е далеку поголем и несогледлив на долг рок, во споредба со материјалното богатство на неодговорни и несовесни поединци, пишува во петицијата.