Бугарскиот премиер, Кирил Петков денеска изјави дека неговата земја направила грешка што се откажала од евтиниот гас од Азербејџан, пренесува БГНЕС.
„Погледнете што се случува на светскиот пазар. Цената на гасот вчера беше 114 евра за мегават/час, немаме гас, можеме само да купуваме. Тоа што се откажавме од евтин гас од Азаербејџан е грешка. Единствено што можеме да направиме е да ја следиме ситуацијата и да купуваме гас кога цената на берзите ќе биде пониска, изјави тој.
Тој најави дека во текот на оваа седмица ќе отпатува за Грција за лично да се увери како напредува поврзувањето со грчкиот гасовод.
„Се надевам дека тој проект ќе биде готов до крајот на јуни. Тоа е огромен проект што јас лично го раководам. Единаесет години не беше изграден, а сега ние ќе се обидеме да го изградиме за шест месеци. Тоа ни се случува заедно со сите останати проблеми. Немаме кризен штаб, не сме подготвени да се соочиме со ценовни шокови, немаме функционална Агенција за бегалци. За 90 дена од ништо правиме нешто“, рече Петков во изјавата за медиумите.
Кирил Петков ја врши премиерската функција во Бугарија од 13 декември минатата година.