Лидерот на НСДП Тито Петковски смета дека сме блиску до решавањето на спорот со Грција, но предупреди дека Грците се одлични трговци и уште подобри преговарачи.
– Не верувам во овие гушкања, добри пораки и срдечни поздрави, затоа што Грците се итри. Тие се одлични трговци и уште подобри преговарачи. Јас тоа не го кажувам првпат. Грчката официјална политика, грчката држава отсекогаш, особено од осамостојувањето, не сакала да постои ниту македонски јазик, ниту македонска држава. Доколку сега има созреани кругови коишто имаат влијание во грчката политика, се однесуваат онака како што говорат, мислам дека сме блиску до решавањето на ова прашање, рече Петковски.
Тој говореше на Конгресот на партијата што се одржу денеска, на кој 500 делегати ќе избираат претседател на партијата и членови на Централниот и на Надзорниот одбор, а ќе биде усвоена и Програмска платформа за делувањето на НСДП.
Петковски во воведното обраќање рече дека е политичко самоубиство настап на избори надвор од двата најголеми политички блока, во услови кога мандатите се распределуваат според Донтовиот модел.
– Оптимизмот го гледам во евентуалните измени на изборното законодавство, кое веќе е најавено, во насока на една изборна единица, отворени листи, како и низок праг за влез во Собранието, рече Петковски кој е единствен кандидат за претседател на НСДП и се очекува да биде реизбран.
Надежта ја гледа во изборната програма на СДСМ зад која, како што рече, застанаа сите политички партии од коалицијата.