Починати од новиот бран се четири лица, од кои три се невакцинирани, а еден пациент кој бил вакциниран со две дози, бил на возраст над 70 години и со  коморбидитети

Петмина пациенти од источниот регион на земјата ја загубија битката со коронавирусот во изминатите 24 часа во штипската Клиничка болница. Станува збор за пациенти од Радовиш, кочанското село Спанчево, Делчево, а две починати лица се од Штип.

Во штипскиот ковид-центар денеска се хоспитализирани вкупно 53 лица, од кои 45 се во модуларната болница, а осум лица се на Кожното одделение, кои се стабилизирани по третманот во модуларната болница. Според податоците од болницата, 37 лица се на кислородна поддршка, а во дневната амбуланта имаат 27 прегледи.

Од Центарот за јавно здравје-Штип денеска објавија детална анализа во која се вели дека во Штип од почетокот на пандемијата до денес се регистрирани 5.229 позитивни лица, починати се 150, оздравени 4.895, моментално активни се 186 лица.

Мал дел од активните случаи се вакцинирани и имаат лесна клиничка слика. Починати од новиот бран се четири лица, од кои три се невакцинирани, а еден пациент, кој бил вакциниран со две дози, бил на возраст над 70 години и со  коморбидитети. Забележани се и по еден случај на новозаразени во три штипски конфекции, кои се инфицирале преку семејни контакти.