Европската перспектива на сите земји од Западен Балкан е стратешка инвестиција во стабилноста и безбедноста на регионот, но и на Европскиот континент – се согласија денеска на средбата на маргините на економскиот форум Делфи, министерката за одбрана Славјанка Петровска и специјалниот претставник на ЕУ за дијалогот Белград- Приштина и други прашања за Западен Балкан, Мирослав Лајчак.
„Северна Македонија со спроведените реформи го заслужи почетокот на преговорите со Европската Унија а моменталниот геополитички контекст не остава простор за одлагање на евроинтегративниот процес кој има сериозна безбедносна димензија“, изјави министерката Петровска на средбата со Лајчак.
Двајцата соговорници констатираа дека дијалогот е најдобрата стратешка инвестиција за земјите од Западен Балкан, а регионалната соработка клучна во процесот на европската интеграција на овие земји.
„Во услови кога светот се справува и помага за намалување на последиците од војната во Украина, Северна Македонија се приклучи на напорите водени од ЕУ за организирање на хуманитарна помош и е подготвена да прифати бегалци од Украина“, рече министерката Петровска.
Составен дел од безбедноста на Европа е безбедноста, стабилноста и просперитетот на Западен Балкан, што, пак, во голема мерка зависи од европските перспективи за регионот. Одлагањето на евроинтегративниот процес отвора можност за пробив на влијанието на трети земји, а ефективниот почеток на преговорите на Северна Македонија со ЕУ ќе испрати јасна порака против тие влијанија, беше речено на средбата.