Привремената комисијата, односно ад – хок телото што треба даго мониторира медиумското известување 100 дена пред избори, упатува јавен повик до сите заинтересирани да аплицират за членство во ова тело.
Рокот за пријавување е заклучно со недела 21 август, а апликациите се испраќаат на contact@avmu.mk.
Четворицата членови на ова тело предложени од СДСМ и од ВМРО-ДПМНЕ Љубомир Костовски, Горан Трпеноски, Цветин Чилиманов и Слаѓана Димишкова денеска ги добија и одлуките за именување. Тие имаат рок до 23 август да го изберат петиот член на привременото тело. Иако според договорот петиот член, треба да биде Албанец, во упатениот повик не се наведува овој услов.
Ад хок телото требаше да биде формирано до 19 август, но поради тоа што измените на Изборниот законик и Законот за медиуми беа објавени во службен весник со задоцнување од четири дена, за толку дена се пролонгира и неговото формирање. Ова тело ќе врши проценка на балансираното известување.
Според партискиот договр, телото првиот прекршок ќе го санкционира со предупредување, а евентуалниот втор сноси парични казни. Ниту еден новинар или медиум нема да биде казнуван за искажување на свое мислење, кое пак, според договореното, треба да се разликува од пласирање на информација.
Директорот на АВМУ, Зоран Трајчевски денеска за МЕТА изјавил дека во тек се подготовките на методологијата за следење на медиумите во предизборната трка која на 26 август треба да биде усвоена на седница на Агенцијата, но и тоа дека нема да се следат порталите.
– Иако во изборниот законик пишува дека треба да се следат и порталите тоа е невозможно. Покрај тоа што има многу портали, дел од нив немаат ниту главен уредник, ниту директор. Така ќе треба едни портали да ги казнуваме, а другите не, затоа што не можеме да им го најдеме сопственикот, ниту уредникот. Затоа во методологијата ќе биде наведено дека порталите нема да ги следиме, туку само телевизиите – вели Трајчевски.