Синдикатот на работниците од управата, правосудните органи и здруженијата на граѓани (УПОЗ) бараат од Владата скалестото зголемување на сите плати во јавниот сектор да се усогласи со растот на минималната плата.
Претседателот на УПОЗ, Трпе Деаноски, вели дека со новата вредност на минималната плата, една цела група вработени во администрацијата кои досега беа малку над минималната плата сега да примаат само минимална плата, посочувајќи дека со тоа процентот на вработени кои примат минимална плата на државно ниво од 13,8 проценти ќе се зголеми на скоро 18 проценти. Доколку Владата, ги почитуваше сопствените закони и вршеше усогласување на платите со порастот на минималната плата, како што е предвидено во членот 8 од Законот за минималната плата до ваквата состојба воопшто немаше да дојде, велат од УПОЗ.
„Во администрацијата и правосудството системот на плати е базиран на бодови кои се добиваат по два основа. Бодови за образование и бодови за ниво за кое е распореден вработениот. Доколку не се спроведе скалесто зголемување на платите ќе се случи вработените од пониските нивоа да ги престигнат вработените од повисоките нивоа, или вработените со средно образование да ги престигнат вработените со високо образование“, изјави Деаноски.
Едно од клучните барање на УПОЗ упатено до Владата е заедно со измената на Законот за минималната плата во скратена постапка да се направат измени и на посебните закони кои ги регулираат платите на вработените во администрацијата и правосудството на начин што вредноста на минималната плата да се земе како основ на плата и сите вработени да имаат одредени бодови за ниво. На овој начин, според нив, ниту еден вработен во администрацијата не би бил на минимална плата и прв пат во историјата ќе имаме усогласување на платите со минималната плата во администрацијата и правосудството. Во спротивно, тие најавија дека ќе бидат приморени да ја активираат одлуката донесена во ноември и незадоволството на вработените да го изразат преку протести или преку други форми на притисок за други форми на штрајк.
Оттаму додаваат дека од моментот на воведување на минималната плата во 2012 година, па до последното зголемување во понеделникот минималната плата ќе се зголеми за неверојатни 120 проценти, а платите во администрацијата и правосудството од 2012 година досега се зголемени за 9 или 10 проценти. Исто така, во последните години со политиките на Владата во одредени сектори на јавниот сектор платите се зголемени дури до 25 проценти, а платите во администрацијата и правосудството не се зголемија ниту еднаш, посочи Деаноски.