Рускиот бизнисмен, Сергеј Самсоненко, денеска во Основниот кривичен суд во Скопје како сведок тврдеше дека законски купил и платил земјиште од околу 10 000 метри квадратни на Водно, од бизнисменот Орце Камчев, објави 360 степени.
Самсоненко сведочеше на предлог на Камчев, кој е еден од обвинетите во случајот „Плацеви на Водно“.
Атрактивниот плац е во сопственост на фирмата „Лајв кеар центар“, која беше сопственост на фамилијата Камчеви, а рускиот бизнисмен ја купил во 2019 година.
„Тоа е моја фирма која е купена на име на жена ми. Веројатно не сум бил тука или поради нешто друго, затоа на нејзино име ја купив. Немам друга сопственост освен плац од 10 000 квадрати”, рече Самсоненко.
Тој рече дека го купил плацот за 110 милиони денари кои според договорот за купопродажба требало да ги исплати за три години, и како што кажа, ги исплатил и предвреме.
„Јас некое време барав голем плац за да изградам куќа за мојата фамилија за живеење. Не можев да најдам тоа што ми треба затоа што барав над 5000 квадрати. И Орце Камчев ми го предложи овој плац како една од варијантите. Јас разгледував неколку варијанти и ја одбрав оваа”, рече Самсоненко.
Според неговото сведочење, бизнисменот сега е во загуба затоа што е блокиран плацот односно нема ниту пат до него.
„Се уште е неизграден пат од општината. Блокиран е, не ми е јасно зошто, а бидејќи трпам штети, го замолувам судот да провери зошто. Барав од адвокатите да ми објаснат зошто е блокиран, не ми е јасно. Кога го купив, проверив, се беше чисто. Со тие пари што ги исплатив можам 15-20 години да живеам комотно во пензија”, рече Самсоненко.
Покрај Самсоненко сведочеше и сопственикот на „Супер трејд“, бизнисменот Владимир Стајиќ, кој исто така купил друг плац од „Лајв кеар центар“, во 2018 година, односно пред фирмата да ја купи семејството на Самсоненко.
Стајиќ кажа дека плацот го купил од Камчев со намера да изгради куќа за да живее во неа или да изгради па да ја продаде. Досега не изградил, како што рече, затоа што во тој период купувал и градел бензиски пумпи, а потоа почнала кризата со пандемијата. Плаќањето, рече, било законски како што договориле правните тимови во договорот за купопродажба.
На прашање на адвокатите на Камчев, дали го познава Никола Груевски, Стајиќ одговори дека ниту го познава ниту некогаш бил во иста просторија со него.
Со овие сведоци, одбраната сака да докаже дека плацевите се легално купени и продадени, наспроти обвинителството кое тврди дека Груевски е вистински сопственик на земјиштето, но со префрлање на сопственоста од една на друга фирма се криел како вистинскиот сопственик.