Палестинската ослободителна организација (ПЛО) соопшти дека „правата на Палестинците не се на продажба“, реагирајќи ги заканите на американскиот претседател Доналд Трамп за прекин на финансиската помош, доколку одбијат продолжување на мировните преговори со Израел.
Членката на Извршниот комитет на ПЛО, Ханан Ашрави оцени дека заканата на Трамп претставува уцена.
– Нема да дозволиме да бидеме уценувани. Претседателот Трамп ги саботираше нашите заложби за мир, слобода и правда, изјави Ашрави.
Таа го обвини Трамп дека сега се обидува вината за своите „неодговoрни постапки“ да им ја префрли на Палестинците.
– Признавајќи го окупираниот Ерусалим за израелски главен град, Доналд Трамп не само што ги прекрши меѓународните закони, туку и во целост ги уништи самите темели на мирот и ја одобри израелската илегална анексија на градот, порача Ашрави.
Како што претходно јави МИА, Трамп синоќа оцени дека мировниот процес на Блискиот Исток е во ќор-сокак и се закани дека ќе ја запре финансиската помош за Палестинците.
– Им плаќаме на Палестинците стотици милиони долари годишно и не добиваме ниту благодарност, ниту почит. Тие дури не ни сакаат да преговараат за премногу одологовлечениот мировен договор со Израел. Ние го „повлековме Ерусалим од масата“ – нејтешкиот дел од преговорите и поради тоа Израел ќе треба да плати повеќе. Но, бидејќи Палестинците не сакаат да преговараат за мир, зошто воопшти во иднина да правиме такви големи исплати, напиша Трамп на неговиот Твитер налог.
Трамп досега во неколку наврати изрази подготвеност да посредува во преговорите за мир на Блискиот Исток, со цел постигнување конечен договор меѓу Израел и Палестинците, но по неговата одлука да го признае Ерусалим за израелски главен град, палестинските автономни власти најавија дека нема да прифатат посредништво на САД во мировниот процес