По пауза од 15 години конечно се ажурира позитивната листа на лекови

Денеска во Владата се одржа состанок на кој присуствуваа министерот за здравство, Фатмир Меџити, заменичката на министерот за здравство, Маја Манолева, советничката за здравство на премиерот, професор  Ана Данева-Маркова, претставници на Фондот за здравствено осигурување и Агенцијата за лекови и медицински средства, претставници од фармацевтските компании, дел од стопанските комори во земјава, а во соработка со Здружението на пациенти на кој се разговараше за можни решенија за ажурирање на позитивната листа на лекови како и за изнаоѓање на одржливо трајно решение со цел поефикасно задоволување на потребите на граѓаните.

Целта на состанокот била  да се подобрат механизмите за навремен и соодветен пристап до современи, висококвалитетни лекови и медицински помагала и да се деблокира  процесот на воведување на нови лекови на листата на лекови кои паѓаат на товар на Фондот за здравствено осигурување.

На денешниот заеднички состанок во Владата било потенцирано дека листата на лекови кои паѓаат на товар на Фондот за здравствено осигурување на Република Северна Македонија не е ажурирана веќе 15 години и дека е неопходно да се прочисти, а лековите кои се застарени да се сменат со нови без при тоа да има финансиски импликации врз буџетот, во исто време додека се бараат начини за воведување на иновативни лекови.
Министерот за здравство Фатмир Меџити на средбата истакнал дека веќе следната недела се очекува да се формира Комисија за позитивната листа. Тој нагласи дека е оптимист и дека очекува што поскоро да се најде решение за прочистување на листата и нејзино дополнување со нови лекови. Затоа, како што рече министерот Меџити, потребно е поедноставување на процедурите.

На средбата се разгледувал и Правилникот за начинот и методологијата за утврдување и донесување на Листата на лекови кои паѓаат на товар на Фондот за здравствено осигурување  кој беше донесен во март 2023 година.

Правилникот, како што се тврди од Владата, е добра основа за изнаоѓање трајни одржливи решенија за обезбедување на неопходните лекови за сите граѓани. „Со носењето на Правилникот за начинот и методологијата за утврдување и донесување на Листата на лекови кои паѓаат на товар на Фондот за здравствено осигурување се отвори можноста за етаблирање на функционален и одржлив систем за редовно обновување на листата на лекови“, велат од Владата. Последните измени во овој Правилник овозможуваат склучување на специјални договори  со кои ќе се овозможи влез на повеќе иновативни лекови за сите пациенти на кои им се неопходни, а истовремено ќе може да се предвиди и заштити здравствениот буџет