Министерот за внатрешни работи седна на маса со претставници на Јавното обвинителство, на Министерството за социјална политика, демографија и млади, на Министерството за правда и на граѓанските организации што работат со заштита на жените со цел да се координираат и да најдат решение како жртвите на семејно насилство да бидат заштитени 24/7.
По трагедијата во Тафталиџе и откако само во 2025 година пет жени беа сурово убиени од нивни партнери, министерот за внатрешни работи Панче Тошковски ги седна на заедничка маса сите институции што се вклучени во заштитата на жените од семејно насилство, уверувајќи дека секој полицаец ќе го даде максимумот за да се спречи насилство врз жена и дете, дури и ако жртвата се повлече од првичната пријава.
Жената што се фрли од балкон од зграда во Тафталиџе заедно со своето дете в раце, повеќепати пријавувала во полиција дека била жртва на семејно насилство, но секогаш ја повлекувала изјавата, вели Тошковски, кој ова го детектира како еден од најголемите проблеми кога жртвата се откажува под притисок на насилникот. Пред да се случи трагедијата, жената пријавила во полиција дека сопругот ја тепал, но пред полицајците рекла дека немале никаков физички контакт.
Иако веќе беше на сила новиот Кривичен законик, според кој полицијата може да постапува по службена должност, дури и кога жртвата ја повлекува пријавата, сепак полицајците не процениле дека жената е жртва на насилство.
Тошковски седна на маса претставници на Јавното обвинителство, на Министерството за социјална политика демографија и млади, на Министерството за правда и на граѓанските организации што работат со заштита на жените со цел да се координираат и да најдат решение како „системот 24/7“ да одговори и да ги заштити жртвите.
Верувајте дека секој македонски полицаец ќе го даде максимумот во рамките на спречување какво било насилство, особено насилство врз малолетни деца и жена, жртви на семејно насилство. Јас сум сигурен дека нема полициски службеник што не би дал максимум кога би излегол на терен и кога би констатирал таква фактичка состојба. Но, притоа мора сите да имаат предвид дека жртвите се под притисок на насилниците, дека можат да сменат изјава, дека можат да ја повлечат, но работата на полициските службеници не треба да заврши тука. Мора да направат процена на ризик, треба да преземат чекори во рамките на утврдена процедура, треба да се обратат до инспектори што се посебно обучени во делот на семејно насилство. Треба да овозможиме реакција од страна на судот 24/7. Имаме многу чекори што може да ги подобриме во иднина, изјави Тошковски.
Тој пред конференцијата зборуваше само за семејното насилство и не сакаше да даде изјава за безбедносните процени што ги направило Министерството за внатрешни работи за поранешниот вицепремиер Артан Груби, кој се врати во земјава и на кој му беше определен притвор.
Свое обраќање имаше в.д. републичката јавна обвинителка Анита Тополова-Исајловска, која исто така кажа дека жртвите ги повлекувале пријавите и дека Јавното обвинителство детектирало недостиг на пријави и информации од центрите за социјална работа и непрепознавање на насилството на терен.
Најголемиот дел од предметите се за кривичното дело телесна повреда. Од почетокот на 2024 година до Обвинителството имало доставено 1.715 постапки за семејно насилство, од кои 798 биле повлечени. Кога жртвата молчи од страв, институциите мора да знаат да ја слушаат кога жртвата се повлекува поради притисок и зависност. Системот мора да биде доволно силен за да ја заштити жртвата, рече таа.
На конференцијата присуствуваа и многубројни организации за заштита на жените.
Извор: Слободен печат.мк / Фросина Факова Серафиновиќ