Кандидатката за претседател на САД од Демократската партија Хилари Клинтон по првата телевизиска дебата води со пет проценти пред нејзиниот противкандидат од Републиканската партија Доналд Трамп, покажува анкетата што ја спроведе Си Ен Ен/ОРЦ.
Според ова истражување, Клинтон има поддршка од 47 проценти, додека Трамп од 42 проценти. Останатите двајца кандидати Гери Џонсон од Либертаријанците и Џил Стеин од Зелените имаат 7, односно 2 проценти поддршка од гласачите.
Клинтон посебно ја зајакнала поддршката кај гласачите кои досега не и биле наклонети. Ако претходно Трамп уживаше поддршка кај мажите за 20 проценти повеќе од Клинтон, по соочувањето, таа се намалила на само 4 отсто.
Истражувањето покажува дека на Трамп не му оди во прилог ни впечатокот што го остава кај гласачите. Само третина од Американците сметаат дека републиканскиот кандидат со својот карактер е соодветен да управува со земјата. Исто толку сметаат дека Трам е подобро подготвен за извршување на претседателската должност. Гласачите Клинтон, пак, ја доживуваат како личност која ќе биде силен водач и подобро ќе ја изврши задачата.