Лидерите на СДСМ и ДУИ, попладнево имале средба, а по средбата од двете партии испратија кусо соопштение за причината за средбата и темите за кои се разговарало.
Во продолжение следува идентичното соопштение испратено од партиите на Заев и Ахмети:
„Ова е прва средба на лидерско ниво помеѓу Претседателот на ДУИ, Али Ахмети и претседателот на СДСМ Заев по предвремените парламентарни избори на 11 декември 2016 година. На средбата начелно се разговараше за ставовите на двете страни коишто ги застапуваат во овој период, без навлегување во детали или разговори за одделни конкретни прашања. Во следниот период за очекување е дека ќе продолжат средбите помеѓу двете страни, за што јавноста благовремено ќе биде информирана“, соопштија од СДСМ и ДУИ.
Вчера Ахмети имаше средба и со мандатарот за состав на нова влада, претседателот на ВМРО-ДПМНЕ Никола Груевски, после која од двете партии стигна идентично соопштение дека било разговарано за актуелната политичка состојба, а била направена и анализа на резултатите од изборите.
Груевски го доби мандатот од претседателот Ѓорѓе Иванов на 9 јануари и има рок од 20 дена да состави влада.