Рафаел Надал го загуби само 26. сет во последните 15 години на Ролан Гарос што, сепак, не се одрази на неговиот пласман во осминафиналето на годинашното издание на парискиот гренслем. Шпанецот остана концентриран во третото коло и на крајот го елиминира Даниел Гофан од Белгија со 6:1, 6:3, 4:6, 6:3.
Бранителот на титулата во четвртото коло ќе игра против Хуан Игнасио Лондеро од Аргентина кој, пак, славеше над Французинот Корентин Муте со 2:6, 6:3, 6:4, 5:7, 6:4.
Убедлив триумф во третиот настап во Париз забележа Роџер Федерер. Швајцарскиот ас авторитативно се држеше во мечот со Каспер Руд од Норвешка кој сериозен отпор пружи во последниот сет. Конечни 6:3, 6:1, 7:6 за третиот светски рекет во јубилејниот 400. натпревар на гренслем турнирите.
Дебито го имаше на 25 мај во 1999 година на Отвореното тениско првенство на Франција. Како тинејџер (имаше 17 години) загуби од Патрик Рафтер додека таткото на Руд, Кристијан во тоа издание на турнирот стигна до третото коло.
Најмногу гренслем дуели по Федерер има Серена Вилијамс која во победата во второто коло над Јапонката Каруми Нара го одигра 382. настап на турнирите од големата четворка. Новак Ѓоковиќ е трет на листата со 308 меча.
Ролан Гарос, 3 коло
Мажи
Надал (2., Шпанија) – Гофан (27., Белгија) 6:1, 6:3, 4:6, 6:3
Федерер (3., Швајцарија) – Руд (Норвешка) 6:3, 6:1, 7:6
Нишикори (7., Јапонија) – Ѓере (31., Србија) 6:4, 6:7, 6:3, 4:6, 8:6
Клижан (Словачка) – Пуј (22., Франција) 7:6, 2:6, 6:3, 3:6, 9:7
Жени
Мартиќ (31., Хрватска) – Ка. Плишкова (2., Чешка) 6:3, 6:3
Стивенс (7., САД) – Херцог (Словенија) 6:3, 5:7, 6:4
Мугуруза (19., Шпанија) – Свитолина (9., Украина) 6:3, 6:3
Севастова (12., Летонија) – Мертенс (20., Белгија) 6:7 6:4, 11:9
Киз (14., САД) – Хон (Австралија) 7:5, 5:7, 6:3
Векиќ (23., Хрватска) – Бенчиќ (Швајцарија) 6;4, 6:1
Конта (26., В. Британија) – Кузмова (Словачка) 6:2, 6:1
Цуренко (27., Украина) – Круниќ (Србија) 5:7, 7:5, 11:9