Поранешниот Генерален секретар на ОН, Кофи Анан, почина денеска на 80-годишна возраст по кратко боледување. Анан беше првиот црномурест Африканец на чело на ОН.
Тој на позицијата Генерален секретар на ОН беше два мандати, од 1997 до 2006 година. Во 2001 година ја доби и Нобеловата награда за мир за хуманитарна работа и залагања, а беше и специјален пратеник на ОН за Сирија, за изнаоѓање на мирно решение за војната.
За негово најголемо достигнување се сметаат Милениумските развојни цели, со кои, за прв пат, се поставија глобални цели по прашањата за борба против сиромаштија и смртноста на децата. Тој беше на чело на ОН во периодот на реформирање на меѓународното тело, но и во периодот на Иранската војна и пандемијата на ХИВ/СИДА во светски рамки.
Анан трпеше и критики за неуспехот на ОН да го спречи геноцидот во Руанда во 90-те години на минатиот век, кога тој беше на чело на мировните операции – сините шлемови – на Организацијата.
Роден во Гана во 1938 година, Кофи Анан беше седми генерален секретар на ОН.
Премиерот Зоран Заев упати телеграма со сочувство до актуелниот Генерален секретар на ОН, Антонио
Гутереш. Во писмото Заев вели дека најдобар начин да му се оддаде почит на Анан е да продолжи работата “кон подобро организиран и помирен свет”.
“Сакам да потсетам дека големите луѓе, како почитуваниот поранешен Генерален секретар на ОН, Анан, кои го посветиле својот живот на доброто во светот, остануваат да живеат во истиот тој свет преку делата
со коишто придонеле за доброто во него.
За граѓаните на Република Македонија, Кофи Анан ќе остане запаметен како вреден пријател, поради неговиот придонес во демократскиот развој на државата, нејзиното меѓународно етаблирање и неговите заложби за
обезбедување перспективна иднина на нашата држава и нашите граѓани во големото семејство на рамноправни народи и држави во светот. За сето тоа остануваме засекогаш благодарни.
Нека почива во мир.”