Најбогатата жена во светот, Лилиен Бетенкур, наследничка на глобалниот козметички гигант „Лореал“, почина во средата во нејзиниот дом во Париз.
Бетeнкур како најголем акционер во компнијата што ја основа нејзиниот татко Јуџин Шулер, „Лореал“, списанието „Форбс“ оваа година ја смести на 14. место. „Форбс“ нејзиното вкупно богатство го процени на 44,3 милијарди долари, што ја прави најбогатата жена во историјата.
Бетенкур поголемиот дел од животот се л држела понастрана од медиумите и ретко давала интервјуа. Нејзиниот татко во 30-тите години на минатиот век ја финансирал насилната фашистичка групација „Ла Кагола“, а по војната на голем број членови на групата им дал засолниште во неговата компанија.
Лилиен во 1950 година се омажила за политичарот Андре Бетенкур, поранешен член на „Ла Кагола“, кој држел неколку министерски места во француската влада во текот на 60-тите и 70- тите, а подоцна работел како директор на „Лореал“.
Таа својот приватен живот го држеше далеку од очите на јавноста, но сепак се најде во центарот на вниманието поради аферата со францускиот писател и фотограф на славните личности, Франсоа-Мари Бание, кој го запознала во 1987 година кога требало да ја фотографира за францускиот магазин „Егоист“.
Во текот на наредните 20 години Бетенкур му давала подароци и услуги во вредност од околу 1,3 милијарда евра: две полиси за осигурување во вредност од 515 милиони евра, 11 уметнички дела вредни 20 милиони евра, а меѓу нив и слики од Пикасо, Матис, Мондријан и друго.
Нејзината ќерка, еден месец по смртта на татко си, во 2007 година покренала обвинение против Бание и го обвинила дека ја искористува психолошката слабост на нејзината мајка за свои цели.
Судењето се развлекувало до 2010 година, бидејќи Лилиен одбивала да помине психолошко тестирање за да се утврди дали е свесна за своите постапки. Тогаш медиумите објавиле снимки направени од нејзиниот батлер Паскал Бонефој, кој снимал разговори со неа, бидејќи се плашел дека боледува од Алцхајмерова болест и дека Бание ја искористил.
Снимките откриле дека Бетенкур во својот тестамент го наведува Бание како единствен наследник на својот имот, освен акциите од „Лореал“ кои веќе биле препишани на нејзината ќерка и на двајца внуци. Лилиен тогаш се смирила со својата ќерка и го избришала Бание од тестаментот.
Семејството во средината на 2011 година покренала судска постапка за на Лилиен да и се додели старател, тврдејќи дека не е во состојба да се грижи за своите потреби и за богатството.
На крајот, судот и го додели богатството на нејзината ќерка, додека нејзиниот внук Жан-Виктор Маерс бил назначен за нејзин личен старател.
Во последните години медиумите ја споменуваа Лилиен како финансиер на конзервативните француски политичари, вклучувајќи го и поранешниот претседател Никола Саркози.