Почина писателката Вера Бужаровска
По кратко боледување на 3 декември во Скопје почина писaтeлката и публицист Вера Бужаровска. Родена е во Битола на 7 декември 1931 година. Писателската кариера ја започнува во 1962 година со објавувањето на детската книшка Стоп наменета како забавна и поучна литература за најмладата читателска публика. Следуваат над четириесетина прозни и поетски остварувања во кои доминираат повести и во чиј центар е жената и нејзината судбина во патријахалното опкружување.
Во овој творечки опус посебно се издвојува романот Акчилница, моќна автобиографска слика за детството на авторката и градот Битола во премрежјето на предвоените и воените четириесетти години од минатиот век. Во последните две децении авторката обработува провокативни теми од македонското секојдневие поврзани со политичкиот живот и криминалот кои и’ носат популарност кај најшироката читачка публика (Трите жени на Усеин, Затвор за жени, Авторот е обвинет за убиство, TAT, Креветот на проституката, Братот на министерот, Го открив атентаторот и др.).
Повеќе нејзини дела се преведeни на неколку јазици, а покрај текстовите објавени во Политика експрес и Илустрована политика во седумдесеттите години од минатиот век, има изработено и сценарија за радио и ТВ проекти.