Претседателот на Сојузот на спортови на Скопје и основач на триатлонот во Македонија, Ѓорѓи Кузмановски почина денеска на 80 годишна возраст.

Кузмановски е роден на 15 јануари во 1942 година. Уште од најмала возраст се вљуби во спортот. Најпрво почнал со тренинзи во ракометниот клуб Пелистер Битола, а паралелно тренирал и фудбал, сè додека не го открие велосипедизмот и тој да стане примарна цел во неговиот живот.

Неговата љубов кон велосипедизмот и мотоциклизмот ја негуваше низ целиот живот. Како страствен велосипедист напишал и публикувал три книги посветени на велосипедизмот кои станале драгоцен прирачник за сите кои се занимаваат со овој спорт. Од Велосипедскиот сојуз на Македонија го доби признанието за најдобар спортски работник на 20 век. Како дел од репрезентацијата на мотоциклисти настапи на девет Европски мото рели натпреварувања. Секоја година беше препознатлив симбол за 8-ми Септември, кога со велосипед поминуваше над 100 километри на различни делници низ Македонија.

Тој низ неговата богата кариера беше дел од повеќе институции во Македонија и поранешната Југославија, како стручен секретар на сојузот за физичка култура на Македонија и раководител на стручната служба, претседател на Велосипедскиот сојуз на Југославија, тренер на југословенската А репрезентација во велосипедизам, основач на триатлонот во Македонија, иницијатор за обнова на Скопскиот маратон, претседател и основач на триатлон клубот „Софка“, прво генерален секретар, а потоа и претседател на Сојузот на спортови на Скопје, која ја извршуваше сè до неговата смрт. Беше активен член во боксерскиот и велосипедскиот сојуз на Македонија.

Во негова чест, Македонскиот Олимписки Комитет утре ќе одржи комеморација во конференциската сала на СЦ „Јане Сандански“ во 13 часот.

Погребот ќе биде во среда на градските гробиштата Бутел, во капела од 12 часот.