Родилката, 37 годишната Слаѓана Демировска од Крива Паланка, починала вчера на пат од кумановската болница до скопските клиники, откако не се разбудила по операцијата со царски рез. Нејзиниот сопруг за НОВА изјави дека вчера кога се породила околу 11 часот тој бил присутен таму, но никој од лекарите не му соопштил дека нешто се случува.
„ Бев вчера околу 11 часот, преку малото прозорче на вратата ми соопштија дена имам син. Околу 17 часот повторно отидов да ги посетам сопругата и синот, ми рекоа дека е пратена во Скопје. Седев и чекав, никој ништо не ми објасни што се случува. По еден час дојде човек не знам дали беше лекар, во цивилна облека, без униформа и ми соопшти дека починала на пат до скопските клиники. Јас, ништо повеќе не знам, не сум ја видел и не знам од што починала, беше здрава, ова и е петто дете, изјави за НОВА Елвис Јусуфов, сопруг на починатата родилка Слаѓана.
Според директорот на кумановската болница Љатифи Ариф, лекарите направиле се што треба и најави дека ќе се изјаснат со официјално соопштение, каде ќе се изјаснат дежурните доктори.
“Според нас, и според лекарите направено е се што треба според протоколите. Дежурните лекари ќе се изјаснат за случајот“, изјави Љатифи за НОВА.
Телото на починатата е однесено на обдукција, а сопругот најавува дека ќе ги тужи лекарите доколку се утврди дека станува збор за лекарска грешка.
Случајот во СВР Куманово е пријавен синоќа околу 20 часот. Смртта, според полицијата, настапила за време на транспортот. За случајот алармираше НРЦ од Куманово, односно изрвшниот директор, Ашмет Елезовски.