Рускиот амбасадор во Анкара, Андреј Карлов кој денеска беше тешко ранет со огнено оружје им подлегнал на повредите, изјави портпаролката на руското министерство за надворешни работи, Марија Закарова, пренесе РТ.
Според руското министерство, Русија го гледа нападот како акт на тероризам и ќе го покрене ова прашање на состанок на Советот за безбедност на ОН.
Карлов беше застрелан за време на неговата посета на една фото галерија во турскиот главен град.
https://twitter.com/iyad_elbaghdadi/status/810900987393310720
Напаѓачот, облечен во костим и вратоврска, се идентификувал себеси како полицаец при влезот во изложбата. Според руските медиуми напаѓачот е мртов.
За време на нападот тој извикал „Алах Акбар“ на арапски, пренесе АП цитирајќи го нивниот фотограф. Тој изговорил и неколку зборови на руски јазик и уништил неколку слики на изложбата.
Нападот доаѓа ден по протестите во Турција заради воената интервенција на Русија во Сирија.
Амбасадорот на Русија посетил изложба наречена „Русија како што ја гледаат Турците“.
Турските медиуми пренесоа дека Карлов држел говор додека во него било пукано со пиштол од позади грб. На интернет веќе се појавија слики и видео од самиот напад, каде се гледа напаѓачот со пиштол во рака додека до него лежи телото на амбасадорот.