На 45-годишна возраст , по долго боледување почина Тихомир Спировски – Младичот, познат театарски, телевизиски и филмски сценограф и костимограф. Комеморацијата по повод неговата смрт ќе се одржи во Драмскиот театар Скопје, утре, со почеток во 10.00 часот.
Погребот ќе се изврши на утре во 15.00 часот на гробиштата Света Недела во Битола.
Спировски беше сценограф и костимограф, кој својата умешност ја вгради во голем број претстави во Македонија и во регионот
Спировски работеше во Драмски театар, но и на голем број сцени во Македонија и во регионот. Тој е добитник на највисоката награда за сценографија и костимографија на Театарски фестивал „Војдан Чернодрински“ во Прилеп.
Работеше на многу голем број претстави, меѓу кои се: „Буре барут“, „Црна дупка“, „Хомо еректус“, „Мара де Сад“, „Дон Кихот“, „Дундо Марое“, „Тетовирани души“, „Македонски рулет“, „Комшилук наопаку“, „Лонг плеј“, „Пат за Никарагва“ и други. А освен во Драмски и во МНТ, работеше во театрите во Струмица и во Битола, во КПГТ во Суботица, во Градскиот театар во Подгорица и во други театарски куќи. Но, својата умешност во осмислување на сценографијата и костимографијата Спировски не ја реализираше само во театар, туку тој се потпишува и во неколку играни и телевизиски филма, како и на реклами и спотови. Работеше на „Крајот на светот“ на Јани Бојаџи, потоа на спотот „Сараево“ – Влатко Стефановски, на „Феномен театар“ и на други проекти.