Во Клубот на пратенциите утрово почна лидерската средба за надминување на разликите односно постигнување политички договор во врска со прашања поврзани со претстојниот референдум и изборот на ДИК.
На лидерската средба присуствуваат лидерите на четирите најголеми парламентарни партии Зоран Заев на СДСМ, Али Ахмети од ДУИ, Христијан Мицкоски од ВМРО ДПМНЕ и Билал Касами од БЕСА.
Ова е трета лидерска средба во последните пет дена. Првите две се одржаа минатата недела, едната во проширен состав со присуство на лидерите на партиите кои имаат повеќе од еден пратеник во Собранието, а втората во скратен состав по барање на лидерот на ВМРО-ДПМНЕ,Мицкоски.
Власта бара од опозицијата поддршка за претстојниот референдум, додека опозицијата инсистира на усвојување на Законот за финансирање на политичките партии, измени во Законот за Влада според пржинскиот модел и измени во Кривичниот законик поврзан со амнестијата.
Освен познатите барања на опозицијата, се бараат и измени во Кривичниот законик со кои би се овозможило функционери од ВМРО ДПМНЕ да избегнат кривична одговорност. Ниту од ВМРО ДПМНЕ ниту лидерот Мицкоски ова официјално не го потврдуваат, но дека вакво барање постои, наведува и изјавата на премиерот Заев, по минатонеделната лидерска средба, кога рече дека нема да има ниту директнаниту индиректна аменстија.
За денеска закажана собраниска седница
Формирањето на ДИК, без што не е можно да се одржи референдумот е едно од горливите прашање, со оглед на тоа што ВМРО-ДПМНЕ бара усвојување на Законот за финансирање на политичките партии и измени на Законот за Влада, според пржинскиот модел пред секои избори, како услов за формирање на ДИК.
Според актуелниот закон, ДИК се бира со двотретинско мнозинство во Собранието, а според договореното меѓу власта и опозицијата претседателот на Комисијата би бил од опозициската партија. Одлуката за распишување на референдумот ја носи Собранието и откако ќе ја донесе тој мора да се одржи не порано од 60 дена, ниту подоцна од 90 дена од распишувањето.
На дневен ред на денешната собраниска седница, како 12 точка е Предлог-законот за измени на Изборниот законик, откако во петокот тој беше усвоен без расправа по 400 те амандмани поднесени од опозицијата. Со измените се предвидува изборот на нови членови на ДИК, наместо со двотретинско мнозинство, да се врши со 61 пратеник.
Заев изјави дека измените ќе чекаат договор на лидерските средби, но се додека е тоа можно. Потоа тие ќе се гласаат во Собранието.