Граѓани од најразлична возраст и денеска точно во 18 часот се собраа пред Специјалното јавно обвинителство од каде ќе започне 12. по ред протест по одлуката на Иванво за колективна аболиција на политичарите.
Како што јавува репортерот на НОВА Влатко Чаловски, бројот на демонстранти од минута во минута постојано расте, а засега пред Специјалното обвинителство нема присуство на полицијата. Граѓаните скандираат „нема правда нема мир“ и носат беџови со написи „Слобода за Здравко“, по денешната кривична пријава на еден од најактивните демонстранти и професор Здравко Савески од Левица.
На протестот од денеска се приклучуваат и членовите на Сојузот на броци на Македонија. На нивниот транспарент се забележуваат врзани македонското и албанското знаме. Меѓу присутните се и политичари од опозицијата.
Демонстрантите обединети под граѓанската палтформа #Протестирам бараат итно повлекување на одлуката за аболиција на сите оние против кои се води истрага и е покренато обвинение од Специјалното обвинителство. Се бара итна и неотповиклива оставка на Иванов од функцијата претседател на Република Македонија, произнесување на Уставниот суд за уставноста на Специјалното јавно обвинителство, како и формирање на специјално одделение во Кривичниот суд за случаите на СЈО.
Дел до барањата исто така се и итно повлекување на одлуката за одржување на парламентарни избори на 5. јуни, задолжително присуство на претставници на граѓанското општество во процесот на решавање на кризата. Тие сметаат дека процесот на решавање на кризата треба да се одвива на територијата на Македонија и тоа сè додека не се формира преодна Влада која ќе ги имплементира реформските приоритети од Извештајот на Прибе.
По одлуката за Иванов протестите освен во Скопје се проширија и во останатите градови низ Македонија, но исто така и во Лондон, Њујорк, Мелбурн, Виена и во останатите метрополи во кои живеат македонски иселеници.