Состанокот меѓу американскиот и рускиот претседател, Џо Бајден и Владимир Путин, почна денеска околу 13 часот. Вилата ,, Ла Гранж“ од 18 век со поглед на Женевското езеро и опкружена со паркови од 30 хектари, каде се одржува Самитот, е буквално забарикадирана од неколкуилјадното обезбедување од копно, вода и воздух. Поточно, за безбедноста се грижат меѓу 3.000 и 4.000 полицајци.
Во собата во која се одвиваат разговорите во вилата ,, Ла Гранж“ има голема библиотека со илјадници стари книги напишани на кинески, француски, на персиски и на турски јазик и ниту една на англиски или на руски јазик. На еден од рафтовите е и швајцарската декларација за трајна неутралност, што се цени за еден од поводите зошто, како место на средбата Бајден-Путин е одбрана Швајцарија.
Според проценките, предвидено е првата средба на двајцата претседатели лице в лице, која се случува набрзо по изборот на Бајден, да помине без високи тонови и да трае меѓу 4 и 5 часа, а може и повеќе.
Средбата ќе помине без јадење, односно без богата трпеза за ручек или вечера, што обично се подготвува за личности од ваков ранг и за вакви средби. Дури и прес конференциите ќе им бидат одделни што доволно зборува за нивото на меѓусебните релации и затегнатоста што е евидентна.
Бајден е придружуван од американскиот државен секретар, Ентони Блинкен, а Путин од шефот на дипломатијата, Сергеј Лавров.