По изнесување на обвинителниот акт од обвинителката Вилма Русковска, Јовановски и поранешната шефица на СЈО, Катица Јанева се изјаснија како невини и ги отфрлија сите наводи. Зоран Милески, пак, ја призна вина и рече дека е свесен за последиците. Тоа беше причина за издвојување на постапките за нив двајца и за него.
Докторот Михаел Донев, кој изврши преглед врз првообвинетиот во случајот „Рекет“, Бојан Јовановски по неговите тврдења дека не е во свесна и рационална состојба да го следи судењето против него, изјави дека тој може да учествува на процесот.
„Притисокот му е 140 со 100, се жали на болки, му дадовме дијазепам. Сметам дека може да присуствува на судењето“, посочи Донев, по што судијката донесе одлука да се продолжи рочиштето.
Лекарите ќе останат во судот за евентуална интервенција ако му се слоши на Бојан Јовановски.
Бојан Јовановски се жали на здравјето, Русковска му вели „добар си“
Со задоцнување од 45 минути, првообвинетиот во случајот „Рекет“, Бојан Јовановски се појави во судницата на Кривичниот суд каде за денеска беше закажано првото рочиште за аферата што ја потресе македонската јавност. Второобвинетиот Зоран Милески-Кичеец и поранешната специјална обвинителка, Катица Јанева, беа спроведени навреме од домашен притвор. Банален технички проблем беше причина за уште 15 минутно одолговлекување на почетокот на судскиот процес. Еден од снимателите при снимање инсерти, нагази на тонски кабел во просторијата, па мораа да интервенираат службите за поправка на дефектот за распитот, конечно, да започне во 11 часот.
На почеток, судијката Николовска-Масевска побара конструктивност од обвинителката Вилма Русковска и одбраната да не го одолговлекуваат процесот, a на бројните новинарски екипи се заблагодари за присуството за јавноста да биде навремено и точно информирна за случувањата во судница. Потоа ја читаше лекарската документација според која Бојан Јовановски не е способен да го следи судењето. Двапати му бил животот загрозен оти бил во критична состојба, па лично го праша како се чувствува.
Јовановски на тоа одговори дека не е добар, но сака активно да учествува во процесот. Само утринава повраќал десетина пати во притворот што била и причина за доцнењето. Затворскиот лекар му рекол да не оди во суд, но тој инсистирал да се појави. По него за збор се јави адвокатот Сашо Дуковски.
„Јас сум подготвен да почнеме од денеска. Но, ние постојано апелираме за здравјето на Бојан. И мене ми се јавија од затворот за да ми кажат дека не е во состојба да дојде, но јас инсистирав да се донесе. Тврдам, под кривична одговорност, дека на Бојан не му се дава соодветна терапија. Еве видете го сами како изгледа“, рече адвокатот Дуковски.
Јовановски побара збор за да потврди дека навистина не ја прима терапијата. Рече дека не ја поседува целата лекарска документација.
Потоа збор доби обвинителката Вилма Русковска.
„Ви тврдиме дека е во добро здравје. Така викаат лекарите од болницата „8ми септември“ кои сигурно нема да ризикуваат лиценца и да лажат со дијагнозите“, рече Русковска.