Петер Мадсен, обвинетиот за убиството на шведската новинарка Ким Вал во август 2017, останува на тврдењето дека станува збор за несреќен случај, изјави денеска неговата адвокатка.
Целиот процес се смета за судење на годината во Данска. Сослушувањето на Мадесен се одвиваше денеска во судот во Копенхаген.
Вол, 30-годишна независна новинарка, исчезна на 10 август минатата година во теснецот Оресунд, меѓу Шведска и Данска, додека пишуваше репортажа за Петер Мадсен и неговата подморница Наутилус.
Петер Мадсен e добро познат во Данска и пред апсењето. Тој изградил сопствена подморница и планирал приватно патување во вселената. Сега е соочен со можна доживотна казна затвор за убиство со предумисла, сквернавење на телото и сексуален напад на Вол, која го придружувала на подморницата пишувајќи напис за него.
Обвинителите сметаат дека тој испланирал се однапред, бидејќи со себе на подморницата имал пила, нож, пластични стеги и тегови. Обвинителите во неговиот компјутер нашле фетишистички филмови со малтретирање жени, за кои тој тврди дека не се негови.
Дванаесетте дена на сослушувањето предвидени до 25 април треба да му овозможат на судот да добие слика за карактерот на обвинетиот и околностите за смртта на Ким Вал.
Уапсен и затворен непосредно по исчезнувањето на младата новинарка, 47-годишниот изумител тврди дека таа починала при несреќен случај, а дека тој во паника го распарчил нејзиното тели и го фрлил во море.