Околу 15 часот, започна средбата во Виена на министрите за надворешни работи на Македонија и Грција Никола Димитров и Никос Коѕијас со медијаторот Метју Нимиц.
Средбата се одржува две недели по разговорите во Охрид. Премиерот Зоран Заев изјави дека очекува исчекор од денешната средба во Виена .
Како што рече, верува во двајцата министри за надворешни работи, а и тој самиот е оптимист.
„Продолжувам јас со оптимизмот, верувам дека креативноста на двајцата министри, тимовите кои што се позади нив, а верувам и дека и јас во моментот, а и Ципрас од друга страна даваме добра поддршка и охрабрување за да се изнајдат навистина конструктивни и креативни решенија кои што буквално ќе ги задоволат и двете страниво нивните очекување, а притоа како што рековме достоинствено ќе с еоднесуваат и за двете земји и за граѓаните на двете земји“ рече Заев.
Портпаролот на грчката Влада Димитрис Ѕанакопулос пред почетокот на средбата во Виена рече дека во преговорите грчката страна направила отстапки и оти сега е време другата страна да ги направи неопходните чекори за постигнување договор. Тој рече дека е јасен начинот како Грција пристапува во преговорите, спомнувајќи ги двата грчки предуслова за постигнување договор .
„Овие два конкретни предуслова се: прво, сложено име и, второ, името да важи „ерга омнес“, нешто за што предуслов е модификација на уставното име на соседот. Сметаме дека во рамките на овие преговори, грчката страна ги има направено нејзините отстапки, има стигнато до средината на мостот и во овој момент, време и за поранешната југословенска Република Македонија да ги направи неопходните чекори за да стигнеме до заемно прифатен договор – рече Ѕанакопулос.
Утре шефот на грчката дипломатија Никос Коѕијас ќе има средба со генералниот секретар на НАТО, Јенс Столтенберг во седиштето на Алијансата во Брисел.
Како што јавуваат грчките медиуми, Столтенберг и Коѕијас ќе разговараат за прашањето за името меѓу Македонија и Грција, за грчко-турските односи и за случајот со двајцата грчки војници што се наоѓаат во турски затвор.
Коѕијас, во интервју за грчкото радио 247, неодамна рече дека на следниот НАТО самит во јули, Македонија не може да стане членка на Алијансата, бидејќи е краток временскиот рок.
Тој додаде дека дури и да се постигне договор, нема доволно време за да се заврши целата процедура.