Денеска во Кривичниот суд во Скопје треба да започне судењето за седумтемина обвинети за уништување на документи поврзани со уништување на опремата за нелегално прислушување, за која СЈО го отвори случајот Тврдина.
Првообвинет е поранешниот началник на петтата управа, Горан Грујовски, кого СЈО го товари за фалсификување службена исправа, односно за уништување на документацијата поврзната со двата системи од нелегалното прислушување. Овие системи, според СЈО, лани биле уништени во нестаандардна постапка. И останатите шестмина обвинети се товарат за незаконско уништување на документација која, како што информираа во СЈО, била потребна во истрагата за откривање на начинот на кој Управата за безбедност и контраразузнавање вршела прислушување.
Како што јавува репортерот на НОВА, обвинителите и обвинетите пристигнаа во судската зграда.
Инаку, на првото рочиште на 4 ноември, СЈО, кое го поднесе обвинението, побара изземање на судијката Лидија Петровска, која беше спомената во една од „бомбите“, аудиоснимките кои СДСМ ги објави. Од разговорот меѓу судијката Софија Лаличиќ и поранешниот директор на УБК, Сашо Мијалков, можеше да се слушне и името на Петровска која наводно давала „сваровски“ подароци за да биде унапредена во кариерата.
Претседателот на Основниот суд Скопје 1, Владимир Панчевски, го одби барањето, а неговата одлука ја потврди и Апелацискиот суд Скопје.
За што се товарат обвинетите?
Во случајот Тврдина, СЈО тврди дека началниците сокриле дека ќе се уништуваат два система за прислушување
Од Обвинителството тврдат дека првоосомничениот началник Горан Грујевски, издал усна наредба до други раководители со цел да прикаже дека постои „наводна потреба“ за ништење и бришење од евиденцијата опрема поради техничка застареност. Целта според нив била да прикрие други лица дека неовластено прислушувале
Тој до второосомничениот доставил предлог да се формира Комисија за попис, ништење и бришење од евидениција и од листата на опремата. Истовремено, според СЈО, тој незаконски предложил членови за Комисија за попис на опремата.
По наредба вториот началник доставил Предлог за формирање на Комисија за попис до секторот за правни работи. Иако секторот укажал на недоследности, сепак вториот началник не дал појаснување, со цел да скрие дека ќе се уништуваат и два система за следење на комуникациите. Иако не добиле појаснување, од Секторот го изготвиле решението по напатствијата дадени од министерката Јанкулоска.
„Кон крајот на март минатата година, министерот за внатрешни без да ги земе предвид законите за постапување со класифицирани информации, без барање на сите организации во УБК, формирала Комисија за попис, расходување, ништење и бришење од евиденцијата и од листата на задолжување на системи и техничка опрема во Управата за безбедност и контраразузнавање. Јанкулоска не зела в предвид ниту дали избраните членовите на Комисијата се поставени согласно закон “, посочи обвинителката Ристовска, на прес конференцијата на која беше презентиран случајот Тврдина.
Веднаш потоа формираната Комисија ја попишала опремата. Се работи за системи од кои едниот бил исклучен уште во 2008, додека останатиот се уште работел. Лицата задолжени за ракување со системот за следење на комуникации го исклучиле системот за следење на комуникации кој тогаш бил во употреба.