Светскиот економски форум (СЕФ) во Давос, 53-ти по ред, ќе се одржи од денеска до 20 јануари, а на состанокот ќе се соберат рекорден број бизнисмени, претставници на најголемите светски компании, државни лидери и познати личности.
Форумот во познатиот швајцарски зимски центар последен пат се одржа во своето традиционално време, во јануари 2020 година, бидејќи во 2021 година беше организиран виртуелно, а минатата година настанот беше одложен за мај поради корона вирусот.
Според официјалната агенда на СЕФ, ќе учествуваат 52 шефови на држави, 56 министри за финансии, 19 гувернери на централни банки, 30 министри за трговија и 35 министри за надворешни работи, претставници на Обединетите нации, Меѓународниот монетарен фонд (ММФ), Светската трговска организација (СТО) а ќе учествуваат и други претставници на меѓународните организации.
Руските претставници, според претходните најави, нема да учествуваат, а се очекува да присуствува и кинеската делегација.
На списокот учесници се лидери од регионот, како албанскиот премиер Еди Рама, српскиот претседател Александар Вучиќ, претставници на Косово, највисоките функционери на Европската унија и европските лидери, како претседателката на Европската комисија Урсула фон дер Лајен, германскиот канцелар Олаф Шолц и други.
Според организаторите, главни теми ќе бидат како да се решат светските економски и еколошки предизвици, војната во Украина и многу други актуелни прашања.
„Сите западнавме во некаква криза“, изјави претходно директорот на СЕФ Клаус Шваб на конференцијата посветена на украинската војна, климатските промени и наизменичните проблеми во снабдувањето со енергија и храна.
Давос треба да помогне да се промени размислувањето по пандемијата, рече Шваб, кој го основаше СЕФ во 1971 година.
Денешниот свет е во критична пресвртница. Пандемијата со КОВИД-19 и војната во Украина го потресоа и онака кревкиот глобален систем. Економскиот раст во најголемите светски економии е во застој, а цените на храната и енергијата продолжуваат да растат, објавија организаторите на овогодинешниот СЕФ.
Тие истакнуваат дека за прв пат од 1970-тите, светот се соочува со несигурна нерамнотежа на раст и инфлација, кои се движат во спротивни насоки.