Околу 400 милиони Европејци од 28 земји-членки на ЕУ од денеска до недела ќе ги избираат своите претставници во Европскиот парламент со мандат во следните пет години.
Први што гласаат денеска се холандските и британските, додека во повеќето земји-членки европските избори ќе се одржат в недела, на 26 мај.
Резултатите што ќе го одредат составот на деветтиот Европскиот парламент ќе бидат познати истиот ден околу 22 часот.
На секои пет години од 1979 година, граѓаните на земјите-членки на ЕУ ги избираат своите претставници во Европскиот парламент како единствено тело на ЕУ кое се избира директно на избори.
Како и на претходните избори во 2014 година, сега се избираат вкупно 751 пратеник од 28 земји-членки.Членовите се избираат пропорционално, членки со помалку жители, како што се Малта или Луксембург, имаат 6 пратеници, додека повеќето членови на Европскиот парламент доаѓаат од Германија (96) и Франција (74).
Според проценки на аналитичари и анкети на јавното мислење во ЕУ, се очекува дека актуелните, но и најстарите сили на европскиот десен и лев центар да продолжат да имаат парламентарно мнозинство во новиот парламентарен состав на Европскиот парламент.
Последните проценки се дека моментално најголемата Европска народна партија (ЕПП), и покрај пад од сегашните 217 места, ќе остане најбројна со очекувани 180 пратеници. Потоа следат социјалдемократите (СД) со очекувани 149 пратеници (во однос на 188 од постоечкиот состав), Алијансата на либералите и демократите (АЛДЕ) со 76 и Зелените со очекувани 57 места во новиот состав на Европскиот парламент.
Освен падот на бројот на т.н. „традиционални партии”, се очекува дека во деветтиот состав на Европскиот парламент, екстремната десница ќе освои повеќе мандати.Последните истражувања покажуваат дека политичката група Европа на нациите и слободата (ЕНФ), предводена од пратениците на францускиот Народен фронт на Мари Ле Пен, може да добијат 62 места во споредба со 37 од сегашниот состав.
Што потоа?
Европските избори се претходница на големи промени во европските институции што ќе бидат извршени до крајот на 2019 година. Во тие месеци ќе има неколку клучни етапи.
На 26 мај, по затворањето на изборните места во Италија (по 21 по Гринич), националните власти на секоја од 28-те држави членки ќе може да објават резултати. ЕП се очекува да објави прогнози за состав на идниот парламент по 18 часот по Гринич врз основа на излезноста.
На 28 мај ќе има вонредна седница на врвот на ЕУ на која ќе се разгледаат резултатите од гласањето.
Секое „политичко семејство“ веќе ќе се знае колку пратеници ќе има во ЕП и ќе настапи момент за преговори за наследници на Жан Клод Јункер и на Доналд Туск – за шеф на ЕК и на ЕС.
На 20 и 21 јуни ќе има нова средба на врвот на ЕУ – завршување на номинациите за водечките европски функции.
Во јули ќе има две работни сесии во ЕП. Првата е од 2 до 4 јули и втората од 15 до 18 јули. Тогаш ќе биде избран новиот шеф на ЕК, избран од државните и владините лидери.
Наесен ЕП ќе се произнесе за составот на новата ЕК, но претходно секоја членка ќе достави име на еврокомесар.
Стапувањето на функција на новата ЕК е предвидено за 1 ноември. Новиот претседател на Европскиот совет ќе стапи на функција на 1 декември.




