Пратеничката група на СДСМ пред почетокот на собраниските седници за следната недела ќе поднесе пакет закони што ги опфаќа предлог-законите за минимална плата, за материјално обезбедување на невработените лица поради приватизација на претпријатијата со доминантна сопственост на државата (стечајците), како и регулативата за укинување на радиодифузната такса.
Законите се поднесуваат по скратена постапка откако се обезбедени средства со донесениот ребаланс на Буџетот.
Координаторот на пратеничката група на СДСМ Томислав Тунтев рече дека за овие закони поддршка побарал и од опозицските ВМРО-ДПМНЕ и Беса.
Со законот за минималната плата ќе се усогласи минималната плата на вработените во текстилната и индустријата за поизводство на кожа, како и покачување на минималната плата на 12.000 денари нето. Со т.н закон за стечајци ќе се овозможи материјално обезбедување на над 3.500 лица односно лица кои најмалку 15 години биле во работен однос во претпријатија во држана сопственост и кои на денот на стапување на сила на законот ќе бидат на возраст од 52 години за жени и 55 за мажи. Тие ќе стекнат право на паричен надомет во висина од 7.596 денари месечно. Укинувањето на радиодифузната такса, како и мерката за враќање на евтината дневна и викенд тарифа на струјата, според Тунтев, ќе го помогне домашниот буџет кај сите граѓани.
Според Тунтев, поради локалните избори Собранието најверојатно ќе заседава најдоцна до 25 септември. Тој не исклучи можност за нови блокади, посочувајќи го искуството со седницата за разрешувањето на јавниот обвинител Марко Зврлески.