Подметнувачот на пожарот на влезната врата од бугарскиот културен центар „Иван Михаилов“ стигнал со велосипед, извадил канистер со запалива течност, ја истурил пред вратата и ја запалил. Притоа тој носел маска на лицето за да не биде препознаен. Пожарот што избувнал веднаш бил огромен и тој се исплашил и побегнал.
Тоа според БГНЕС го изјави министерката за надворешни работи на Бугарија Теодора Генчовска за Бугарската телевизија, велејќи дека го видела потпалувачот на снимки од камера. Генчовска која вчера и денес е во Скопје, вчера ја прекина средбата со нејзиниот домаќин Бујар Османи и замина за Битола.
„Подметнатиот пожар во Битола е изведен ладнокрвно и намерно. Штом дознав на нашата средба со Бујар Османи за палењето на домот за култура, заминав за Битола. На лице место се сретнав со директорот на битолската полиција. Им благодарам за брзата реакција и на противпожарната бригада и на полицијата, дежурниот обвинител. Директорот на полицијата се обврзува да вложи максимални напори за откривање на сторителот на овој немил чин и вандалски чин“, изјавила Генчовска.
„Моите очекувања се дека судството во Северна Македонија ќе си ја заврши работата. На снимките на една од камерите можев да видам човек кој мирно пристигнува со велосипед, вади цевка со запалива течност и мирно ја истура течноста пред вратата од куќата. Оваа смиреност беше малку нарушена, бидејќи пожарот што избувна беше огромен, се исплаши, се сомневам дека лицето има некои повреди од овој пожар, можеби ќе побара лекарска помош. Човекот носел маска“, рече Генчовска. „Мое лично мислење е дека ова дело е направено ладнокрвно и намерно и намерно“, вели таа.
„Не верувам дека тоа ќе влијае на нашиот однос со Cеверна Македонија. Во моментов нашите односи се нормални и конструктивни, има нормален работен дијалог. Двата тима работат напорно и потребни се многу часови, продолжуваме да се обидуваме да најдеме решение за отворените прашања во спроведувањето на Договорот за добрососедство“, изјавила Генчовска.