Резултатите од обдукцијата покажаа дека Ким Јонг Нам, полубратот на севернокорејскиот лидер Ким Јонг Ун, починал 15 до 20 минути по нападот со смртоносниот нервен отров ВХ, објави малезиската влада.
Според снимките од надзорните камери, Ким го отруа две жени кои на 13 февруари му прснаа отровен хемиски агенс на аеродромот во Куала Лумпур.
Тој се обрати за помош на аеродромските службеници, но почина на пат до болница.
„Почина во возилото на итна помош. Мислам дека од примањето на отровот до смртта поминале од 15 до 20 минути“, изјави министерот за здравство.
„Дозата била толку висока што делувала многу брзо во целото тело“, додаде министерот.
Само 10 милиграми од отровот е доволно за да биде смртоносен. А, при труењето на Ким била употребена далеку поголема доза.
Виетнамката осомничена за убиството на полубратот на корејскиот лидер рече дека верувала оти учествува во снимање на шега и за таа улога добила симболична сума (50 евра), објави вчера виетнамското Министерство за надворешни работи.
„Во текот на средбата на која присуствуваа претставници од амбасадата на Виетнам, осомничената Доан Ди Хуонг, рекла дека е искористена и верувала дека настапува во скриена камера“, наведе министерството во своето соопштение.
И втората инволвирана жена од Индонезија тврди дека и таа мислела дека станува збор за скриена камера.