Руските власти за организација на Зимските олимписки игри потрошиле над 50 милијарди долари со што станаа најскапи во историјата.
Потрошени се четирипати повеќе пари од планираните и со тоа е урнат рекордот на летните олимписки игри во Пекинг 2008 кои чинеа 44 милијарди долари.
Денеска во 17 часот и 14 минути по македонско време, а во 20.13 по руско во Сочи службено ќе започнат 22-рите зимски олимписки игри со надеж дека ќе поминат без инциденти и покрај заканите од терористите во Кавказ.
Последните ЗОИ во Ванкувер чинеа осум милијарди долари, а рускиот претседател Путин се даде на трошење најверојатно со цел демонстрација на моќта на земјата, а во истовреме ова е прилика за да го подобри својот имиџ.
На територијата на Русија се изградени 11 борилишта поделени во два округа – Олимписки парк во градот на брегот на Црното море и планински комплекс во Красна Пољана..
Безбедноста е подигната на највисоко можно ниво, а Сочи практично е обиколен од над 40.000 полицајци и војници со цел спортистите од 88 земји да се чувствуваат како дома. И покрај тоа многу делегации имаат и сопствено обезбедување, а најбројни се телохранителите на Американците.
И покрај позитивните впeчатоци на спортистите, новинарите ги преплавија социјалните мрежи со бројните неприлики при хотелското сместување.
>>Сочи: Новинарите вчудоневидени од условите во хотелите
На ЗОИ учествуваат 2.800 спортисти во седум спортови и 15 дисциплини. Најбројни се Американците 230, петмина повеќе од домаќините Руси. Македонскиот олимписки тим ќе биде претставена со тројца спортисти. Тоа се алпскиот скијач Антонио Ристевски и „нордијците“ Дарко Дамјановски и Марија Коларовска.