На една хемиска фабрика во Крозби, Тексас и се заканува експлозија или пожар во наредните неколку денови доколку не се обезбеди струја потребна за ладење на хемикалиите, изјави директорот на фабриката Ричард Роу.

Според него, не постоел начин да се спречи тоа поради големото количество вода која го расипала системот за разладување во фабриката „Аркема“ која произведува органски пероксиди за индустријата за гуми и пластика.

Вработените се евакуирани, како и жителите на околу два километри од фабриката.

Температурите во фабриката се контролираат по далечински пат од команден пункт поставен во непосредна близина.

Службата за еколошка заштита соопшти дека во пречник од 4,8 километри околу фабриката има околу 1.300 домови со 3.800 луѓе.

Компаниите Ексон и Шел кои имаат рафинерии во оваа област соопштија дека како последица на поплавите  од постројките се ослободени извесни количини хемикалии.

Жителите изминативе денови се пожалија на непријатна миризба низ Хјустон, а активистите за заштита на животната средина велат дека локалните жители се жалат на главоболки, грло и печење на очите.

Тропската бура Харви проследена со изобилни дождови предивика големи поплави во Тексас, каде загинаа 22 лица. Бурата сега пристигна во сојузната држава Лујзијана.