Во цивилизирана Европа во 21 век – нема место за проблемите кои Бугарија ги отвора за македонскиот јазик и идентитет. Ваква порака испратија германските дипломатки Сузане Шуц и Сабине Штер на панел дебатата денес во Скопје.
Шуц, директорка за земјите од Западен Балкан и Штер директорка за европска политика во германското МНР, во Скопје пристигнаа од Софија и порачаа дека решение на македонско-бугарскиот спор мора да има, но во европски рамки.
– Тука се работи за Европа од 21 век. Прашањата дали зборувате македонски или бугарски или руски или украински, ова  е едно прашање кое што не треба да биде дискурсот кој што го имаме кога зборуваме за демократски земји, рече Сузане Шуц.

Германија, како што беше нагласено, не се откажува да работи на преговорите меѓу Скопје и Софија, но на македонската политичка елита останува тежината да размисли и покаже до каде може да оди во компромисот со Бугарија. Германскиот став е дека не може да се дозволи идентитетските прашања да бидат вклучени во преговарачката рамка.
– Вашата земја, владата и сите проевропски сили треба да донесат одлука до каде може да оди компромисот. Не верувам дека ќе се прави компромис за националниот идентит, меѓутоа може да има компромиси на другите работи во однос на чекорите на пристапување, колку другиот ќе попушти, колку другиот ќе прифати, смета Сабине Штер директорка за европска политика во Министерството за надворешни работи на Германија.

На конференцијата присуствуваше и францускиот амбасадор Сирил Бомгартнер кој подвлече дека е свесен за големиот број критики поради промената на методологијата за проширување на која Париз инсистираше, но дека е направен вистински потег.
– Уверен сум дека методологијата е вистинското решение. Точно е дека сега треба попрецизно да кажуваме како треба да функционира тоа, како се реализира, но едно е јасно, ако процесот не оди добро, нема вистински резултати на терен, вели амбасадорот.

Од македонска страна беше испратена порака дека месец јуни е клучен за датум за преговори на Македонија со ЕУ, а уште едно НЕ од ЕУ ќе придонесе за тешки последици во регионот и дополнително ќе го зголеми и притисокот врз Албанија да бара раздвојување на пакетот.