Поранешната врвна шпиунка на Северна Кореја Ким Хјун Хи проговори за најновите закани од Пјонгјанг, но и за времето кога како терористка морала да дигне во воздух цивилен авион на Јужна Кореја во 1987 година убивајќи ги сите 115 патници.
Поранешна врвна шпионка, која сега живее на тајна локација во Јужна Кореја, вели дека најновите закани на Пјонгјанг се само обиди на новиот лидер Ким Јонг Ун да добие масовна поддршка и да се наметне како цврст лидер, посебно меѓу војската.
Ким Хјун Хи, како девојче била киднапирана и одведена за да служи на Северна Кореја. Се обидувала да се отруе откако ја фатиле Јужнокорејците.
Хи изјави дека во 1987 година добила наредба од лидерот на Северна Кореја, Ким Јонг Ил, да постави бомба во јужнокорејски авион. Таа тоа го направила и сите 115 патници починале. Оттогаш, САД ја ставија Северна Кореја на списокот на земји кои го спонзорираат тероризмот.
Денес е омажена и има две деца, но секој ден живее во страв дека агентите од Северна Кореја ќе ја фатат и убијат. Сега вели, живее покајнички живот.
– Мислев дека Ким Ил Сунг всушност е бог. Научени сме да го славиме него пред своите родители. Од мали нозе бевме учени да зборуваме: ”Фала ти голем владетелу, на се!” И ако кажеш нешто погрешно, дури и ако е во прашање само шала, луѓето завршуваа во логори. Северна Кореја не е држава, тоа е секта- вели Хи.
Таа раскажува како станала шпион за Северна Кореја.
– Пред моето училиште застана лимузина. Внатре беа луѓе од партијата кои ми рекоа дека јас сум одбрана. Немав време ни да се простам од родителите, само ми рекоа да се спакувам. Тоа беше во 1980 година, вели таа.
Била испратена во елитно училиште за шпиони. Добила ново име под кое работела, научила боречки вештини и работа со оружје. Правата задача и била да ја постави бомбата во јужнокорејскиот авион.