Поранешните функционери на ВМРО-ДПМНЕ Мартин Протуѓер, Гордана Јанкулоска, Миле Јанакиески и уште пет други обвинети преземаа одговорност во дел од обвиненијата во случајот „Титаник“ и признаа вина на новиот почеток на судењето.
Станува збор за судски процес кој се однесува на обвинение за сторени кривични дела поврзани со изборни нерегуларности, а кој почнува од почеток поради смена на поротник.
На новото отпочнување на главната расправа Мартин Протуѓер изјавил дека по однос на дел од обвинението презема одговорност од морален аспект, а поранешната министерка Гордана Јанкулоска која издржува затворска казна исто така признала вина.
Таа, во својот исказ пред судот рекла дека по однос на обвинението кое е во правна сила повеќе од четири години, постапката не треба да се води затоа што екс претседателот Ѓорѓе Иванов, во времето донесе одлуки за помилување и ослободување од кривично гонење.
– Тоа се серија одлуки објавени во Службен весник. Сепак, по однос на наводите на обвинението имајќи предвид дека оваа постапка, сепак се води, сакам да наведам дека лично сметам дека одговорноста треба да се преземе и во таа смисла, по однос на наводите во ова обвинение се изјаснувам како виновна, рече Јанкулоска, пренесе А1 он.
И поранешниот министер Миле Јанакиески признал вина, но и според него поради помилувањето од поранешниот шеф на државата Ѓорѓе Иванов не требало да се води овој судски процес.
– Признавам вина за дел од кривичните дела кои ми се ставаат на товар. Во однос на делата чувствувам морална вина и затоа се произнесов за виновен. Тоа е мое лично чувство и се однесува на мене и моите позиции. Чувствувам потреба да преземам одговорност и да демонстрирам морален чин. Ја користам приликата да упатам извинување до сите оние кои на било кој начин биле навредени и повредени слушајќи ги т.н бомби. Се надевам дека ова ќе биде поттик во иднина кој би предизвикал промени. За останатиот дел од обвинението, не се чувствувам виновен, рече Јанакиески.
Поранешниот пратеник Илија Димовски рече дека не е виновен за делата за кои е обвинет затоа што никогаш претходно не извршувал функција претседател, генерален секретар, шеф на изборен штаб и со оглед на тоа дека бил хиерархиски подреден и не собирал финансиски средства, а е обвинет за такво дело.
И Билјана Бришковска, поранешна заменичка за правда на новиот почеток од постапката за „Титаник”, посочи дека презема одговорност.
– Истакнувам дека прифаќам одговорност и тоа го правам од човечки, професионален и одговорен аспект, но и од аспект на позициите кои сум ги извршувала. Како човек со интегритет и вредности во кои верувам и се залагам, би сакала од аспект на позициите кои што сум ги обавувала да покажам дека треба и мора да се почитува правната држава и дека за тоа секогаш ќе се залагам. Нека овој гест биде пример дека човек мора да опстои на принципите во кои верува прифаќајќи одговорност кон правдата. државата, народот, соработниците и колегите“, рече Бришковска.
Случајот „Титаник“ го води судијата Осман Шабани, а обвинението го застапува обвинителката Лиле Стефанова.
Освен поранешниот премиер Никола Груевски кој е во бегство, во „Титаник“ обвинети се и Кирил Божиновски, Миле Јанакиески, Гордана Јанкулоска, Билјана Бришкоска Бошковски, Илија Димовски, Мунир Пепиќ, Едмонд Темелко, Леко Ристоски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашајковска.
Тие се обвинети за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.