Пресудата требаше да биде сооопштена на почетокот на февруари. Но наместо тоа случајот „Еразмус“ за земање мито за полагање испити, во кој се обвинети поранешниот декан на Економскиот факултет, Бобек Шуклев, неколкумина професори и демонстратор на тој датум треба да почне од почеток. Причина за тоа е промена на Судечкиот совет, односно заминување на поротник на работа во Германија.
Заминувањето на поротникот ќе влијае врз процесот, посочи судијата Владимир Туфегџиќ, и побара согласност од обвинетите на следното рочиште да бидат исчитани сите докази, а да не се изведуваат за да не се одолговлекува процесот, со што се согласија адвокатите на обвинетите. Поротникот известил дека добил работна виза и за седум дена заминува за Германија. Судечкиот совет проценил дека во тој период не може да донесе пресуда и испратил барање до претседателот на судот за назначување на нов судија поротник кој треба да биде запознаен со предметот и доказите.
Обвинителството за организиран криминал за предметот „Еразмус“ гони петмина осомничени, меѓу кои поранешниот декан и професор на менаџмент, Бобек Шуклев. Предметот е отворен во јуни 2016 година. Професорите се сомничат дека барале и примале поткуп од 500 до 1.000 евра за да им пишат преодна оценка за положен испит на студенти без знаење, а имало случаи кога студенти добиле шестка иако немале право да го полагаат испитот или не им бил пријавен во таа испитна сесија. Обвинети се професорите Бобек Шуклев, Славе Ристески, Драган Јанев и Стојан Дебарлиев.
Ексвработениот во бифето на Економскиот факултет, Дејан Трајковиќ, кој е сведок во случајот „Еразмус“, на минатото рочиште во судницата рече дека професорот Бобек Шуклев од студентка барал секс или пари во замена за преодна оценка. Трајковиќ бил посредник помеѓу две студентки и професорот и тврди дека не дошло до договор за секс во замена за оценка. Сведокот во исказот рече дека тој очекувал исто така да добие сексуални услуги од девојчињата во замена за посредувањето меѓу нив и професорите.