Во пресрет на посетата на албанскиот премиер Еди Рама во Белград, премиерот на Србија Александар Вучиќ потенцира дека сите проблеми треба да се решаваат со разговори, а Србија нема да дозволи нејзиниот народ да биде понижуван.
– Сите проблеми мора да ги решаваме преку разговор, но од друга страна Владата на Србија мораше да покаже дека нема да дозволи понижување на државата и народот, изјави Вучиќ за српски „Блиц“.
Во телефонски разговор премиерите Рама и Вучиќ разговарале и за посета на српскиот премиер во Тирана, а како значителен пресредник помеѓу нив била Германија, односно разговорот на Вучиќ со германската канцеларка Ангела Меркел веднаш после случувањата на фудбалскиот терен во Белград.
Рама и Вучиќ се договориле официјалната посета на албанскиот премиер да биде презакажана за 10.ноември.
Во однос на инцидентот и понатаму има несогласувања помеѓу двете земји но ставот е дека тоа не треба да биде изговор за пропуштање на шансата да се разговара за регионалната стабилност, соопштуваат српските медиуми.
Вучиќ и Рама истакнуваат дека е неопходно да се продолжи со дијалогот започнат во Берлин на 28.август бидејќи само така ќе се подобрат односите помеѓу двете земји, регионот и Европа.