Поради сериозниот пад на вредноста на акциите на светските берзи поради коронавирусот, вкупната сума што 500-те најбогати луѓе на планетата ја изгубија во минатата недела изнесува 444 милијарди долари, јави агенцијата „Блумберг“.
Агенцијата во својата анализа наведува дека најголеми загуби претрпеле Извршниот директор на Амазон, Џеф Безос, коосновачот на Мајкрософт, Бил Гејтс, и генералниот менаџер на француската групација ЛВМХ („Луј Витон“, „Моет“, „Хенеси“), Бернар Арно. Според проценките, нивната состојба на сметките е намалена за околу 30 милијарди долари.
Извршниот директор на „Тесла“, Илон Маск, 25-ти на листата на најбогати луѓе на планетата, неделава загубил девет милијарди долари, како резултат на падот на вредноста на неговите акции.
Според „Вол Стрит Журнал“, последната недела се претвори во најнесреќната за американскиот берзански пазар по финансиската криза во 2008 година. Падот на индексот „Дау Џонс“ за оваа недела изнесуваше 12.4 отсто, на „S&P 500“ – 11,5 отсто, на „НАСДАК“ – 10,5 отсто.
Истовремено, котирањата на акциите на повеќе од 95 отсто од компаниите, претставени на листата на индексот „S&P 500“ паднаа за повеќе од 10 отсто во однос на претходно постигнатите максимуми.