Иако предвидувањата беа дека по Брегзит многу држави од ЕУ ќе тргнат по стапките на Велика Британија и ќе одржат референдуми за членството во Унијата, анкетите покажуваат сосема поинаква ситуација.
Во Германија порасна поддршката за канцеларката Ангела Меркел и нејзината популарност сега е најголема во последните 10 месеци, и сега се наоѓа на она ниво на кое беше на врвот од бегалската криза лани во септември.
Анкетата на агенцијата Инфратест Димап објавена во петокот покажува и пораст на поддршката за нејзината партија ЦДУ за 2 отсто и за еден отсто на левичарската Социјалдемократска партија. Од друга страна, десничаркста АФД доживеа пад на попуарноста за 3 прпоценти.
– Дебатите за Брегзит меѓу германската популација предизвикаа создавање на поголемо проевропско расположение. Од овој тренд профитира Владата додека популарните евроскептични партии трпат пораз, изјави директорот на агенцијата Михаел Кунерт.
Во Холандија, една од државите за кои се говореше дека би биле меѓу првите кои би тргнале по стапките на Британија, поддршката за Слободарската партија на ултрадесничарот Герт Вилдерс падна на најниско ниво од минатата есен.
Една од анкетите покажа дека Вилдерс би добил 30 од 150 места во Парламентот доколку сега би се одржале избори, што е за три места помалку од минатата недела.
Порасна и популарноста на Социјалистичката паритија, која е евроскептична по своите ставви, но не е за излез од ЕУ, а добро поминуваат и проевропските партии.
Политичкиот хаос и економската несигурност кои уследија во Британија по референдумот влијае на промената на мислењето и во Австрија.
Непосредно по Брегзит, речиси половина од испитаните Австријци рекле дека се за излез од ЕУ. Анкетата која ја спроведе Галуп на 5 и 6 јули покажува дека во моментов само 30 проценти од нив би гласале за напуштање на Унијата.
Промената на расположението по се изгледа влијаела и на ставовите на десничарскиот претседателски кандидат Норберт Хофер. Тој претходно се залагаше за референдум за излез од ЕУ доколку во неа влезе Турција, а во петокот изјави дека воопшто не е за таква опција.
– Доколку Австрија излезе од ЕУ тоа без сомение ќе и нанесе штета, изјави тој.
Данците исто така повеќе ја поддржуваат ЕУ. Анкетите по референдумот во Британија покажуваат дека поддршката за референдум во врска со членството паднала од 40 на 32 проценти.
Ниту Финците не се расположени за референдум, а исто така и Италијанците, иако популарноста на евроскептичните партии кај нив е на високо ниво.
Околи две третини од Италијанците во случај на референдум би гласале за останување во ЕУ, покажува една неодамнешна анкета.
Единствено во Франција е забележен еднаков процент на поддршка за десничарите како и пред Брегзитот.
Во меѓувреме, Британската Влада денеска официјално ја отфрли петицијата за одржување нов, втор референдум за членство на Британија во ЕУ која досега ја потпишаа над 4 милиони луѓе.
Во случај кога петицијата на сајтот на британскиот Парламент ќе надмине 100 илјади гласови, парламентарниот комитет за петиции ја разгледува можноста дали да ја изнесе пред Парламентот на дебата.
Во петицијата пишува: Ние потписниците на оваа петиција бараме од Владата на нејзиното Височество да го примени прописот, ако некоја страна за или против добие помалку од 60 отсто од гласовите, а излезноста не надмине 75 проценбти, треба да биде одржан втор референдум“.
На референдумот на 23 јуни излезноста беше 72 отсто, од кои 52 отсто или 17,4 милиони го поддржаа Брегзит.
Во одговорот на петицијата, Владата вели дека не е одредена минимална излезност кога Парламентот го носел Законот за референдум за членството во ЕУ.
Уште се наведува дека како што рекол премиерот Дејвид Камерон во обраќањето на 27 јуни тоа е еден од најголемите вежби по демократија во британската историја.
– Сега мора да го подготвиме процесот на излегување од ЕУ, а Владата е посветена на тоа да обезбеди најдобар можен исход за народот на Велика Британија во преговорите за тоа, се вели во соопштението од Форин офисот.