По вчерашната снимка објавена на „Јутјуб“, денеска се појави нова снимка од разговор меѓу Игор Јанушев и Миле Јанакиески од ВМРО ДПМНЕ. Во неа се слуша како Јанушев револтирано раскажува како извесна Даниела и Ратко го нервираат затоа што не биле добро координирани каде да ги однесат компјутерите.
„Нека помине денов, утре ќе ги убијам“, вели Јанушев во дел од разговорот.
„Вчера вечерта го правевме муабетот. Рекоа дека имале систем не знам каков, боље ќе било така и ајде викам да не правам гужви. Се слушнав сега со Влатко се договоривме. Мислам не е тоа проблем, еве за две минути можат да бидат во Буњаковец. Влатко ми рече ок, нека останат таму, ќе средиме. Гласав ама истура, не можеме да се вратиме во Скопје, знаеш како врне, истура“, вели Јанушев во разговорот со Јанакиески.
Во второто видео објавено денеска на истиот Јутјуб канал, Јанушев и Јанакиески зборуваат за списоци со гласачи.
„Не знам на кого веќе што му е пратено“, вели Јанушев, а потоа споменува и за некои 2.000 луѓе од Центар и за 448 луѓе од Телеком Центар.
Јанакиески своевремено беше министер за транспорт и врски во Владата на Никола Груевски, а Игор Јанушев во моментот е носител на кандидатската листа на коалицијата предводена од ВМРО-ДПМНЕ во третата изборна единица.