Голем пожар избувна синоќа во бегалскиот камп „Морија“ на грчкиот остров Лезбос во Егејското Море, соопшти претставник на локалната полиција.
Грчките медиуми јавија дека меѓу три и четири илајди мигранти побегнале од кампот, користејќи го хаосот што настанал за време на пожарот.
Засега нема информации за жртви, но се наведува дека целосно се уништени поголем број шатори во кои биле сместени мигрантите.
Гаснењето на пожарот и пристапот на противпожарните екипи во кампот бил отежнат поради тепачките кои избувнале меѓу мигранти од различни националности за време на инцидентот, Сепак по неколучасовни напори, пожарникарите во текот на ноќта успеале целосно да го изгаснат пожарот.
Причините за пожарот засега се непознати, но полицијата претпоставува дека најверојатно тој бил намерно предизвикан.
Весникот „Катимерини“ пишува дека пожарот избувнал за време на немири до кои дошло по вчерашните протести на мигрантите, предизвикани од неофицијалните гласини дека властите планираат наскоро да ги вратат во Турција.
На протестите на мигрантите им претходеше собир на локални жители на селото Морија, кои од властите побараа дислокација на бегалскиот камп од островот.
По овој собир и информациите дека ќе следи нивна екстрадиција во Турција, група од околу 300 мигранти го напуштиле кампот и се упатиле на протест кон селото Морија, ново тоа биле спречени од полицијата, кои ги принудила да се вратат назад.
Според „Катимерини“, додека мигрантите се враќале во кампот, пожар избуван во блиската плантажа со маслинови насади, кој потоа се проширил и на центарот во кој се сместени бегалците.
Според податоците на грчките власти, во време на избувнувањето на пожарот во кампот „Морија“ престојувале околу 5.650 бегалци и мигранти, иако објектот има капацитет за сместување на 3.500 лица.