Мартин Костовски, пратеник од СДСМ денеска на Комисијата за избори и именувања излезе со тврдење дека професорката Родна Живковска која е кандидатка на ВМРО-ДПМНЕ за член на Уставниот суд е донатор на опозициската партија која и подарила 25.000 денари и дека не е имуна на политички влијанија, ниту е независен кандидат.
Костовски, тврди дека овој податок го имало во финансискиот извештај потпишан од пратеникот Игор Јанушев.
-Не станува збор за аполитична личност, јавноста мора да знае дека професорката Родна Живковска на 14 февруари 2020 година има уплатено 25.000 денари како донатор на ВМРО-ДПМНЕ, а нејзиниот син Иван е претседавач на Советот во општината Кисела Вода и е длабоко инволвиран во политичките случувања во партијата, реплицираше пратеникот Костовски на излагањата на пратениците од ВМРО-ДПМНЕ дека се залагаат за независно судство.
Пратеникот Павле Трајанов од Демократскиот сојуз побара од пратениците да не ги дискредитираат предложените кандидати затоа што сите кандидти се предлози на партиите.
(С.М)