Пратениците од ВМРО-ДПМНЕ на јавната расправа за новиот закон за Јавно обвинителство го прекинаа излагањето на Државниот јавниот обвинител, Љубомир Јовески, истакнувајќи од галеријата транспарент на кој пишуваше „Господине Јовески, до кога ќе го криете писмото на притворената Катица со кое ви даде незаконска наредба?“.
Транспарентот го извадија пратениците Антонио Милошоски, Дафина Стојановска и Горан Манојлоски.
Претседателот на Комисијата за политички систем, Александар Кирацовски даде пауза од пет минути додека тие го собираа транспарентот.
Јовески рече дека нему не му смета пораката од пратениците на ВМРО-ДПМНЕ пласирана на недоличен начин, по што продолжи со своето излагање, а Кирацовски ја продолжи јавната расправа со зборовите: „Циркузот заврши“.
Токму пратениците на ВМРО-ДПМНЕ побараа обвинителот Јовески да се појави на расправата за Законот за Јавно обвинителство, поради што ја напуштија и последната средба со претставниците од сите парламентарни партии.