Демонстранти во десетици европски градови денеска ќе излезат на осмомартовски протести под глобалното мото на Обединетите нации за годинава, кое гласи: „Права. Правда. Акција. За сите жени и девојки“
Меѓународниот ден на жената ќе биде во знакот на барањата за итна институционална пресметка со родово заснованото насилство и крај на економската дискриминација, додека во фокусот на светската јавност е заштитата на жените во воените зони и нивната улога во мировните процеси.
Протестен марш се одржува и во Скопје, а тој доаѓа само неколку дена откако македонската јавност ја потресе трагичниот случај со Ивана Јовановска, која скокна од балкон од зграда заедно со шестгодишната ќерка, откако двете со години трпеле брутално насилство од нивниот сопруг и татко, Стојанче Јовановски.
Во Белград, активистите ќе протестираат под мотото „Ниту една повеќе“, а предвиден е марш низ центарот на градот. Главното барање е законски да се дефинира фемицидот како посебно кривично дело. Албанија: Во Тирана и Корча, денешните протести се фокусираат на социјалните последици од емиграцијата и зголемената ранливост на жените во руралните средини.
Во Софија, за денеска се закажани низа конференции и маршеви со фокус на економската рамнотежа и целосно затворање на платниот јаз меѓу мажите и жените, додека во Турција се најавени собири во Истанбул и во Дијарбакир, каде се очекуваат илјадници жени. Во Албанија, ќе има протести во Тирана и во Корча. Во Атина, женските организации ќе протестираат против влијанието на економската несигурност врз работните права на жените и мајчинството.
Во Загреб и во Љубљана, пак, денешните маршеви се насочени кон одбрана на репродуктивните права како одговор на обидите за ограничување на правото на безбеден абортус.
Низ европските метрополи, 8 март 2026 година минува во знакот на барања за конкретни правни реформи. Во Франција и во Шпанија се очекуваат најмасовните собири во цела Европа а фокусот е на ревизијата на законите за сексуална согласност и на еднаквоста при вработувањето.
Во Берлин и во Хамбург, денешните протести се фокусирани на „невидливиот труд“, а учесниците ќе побараат подобро вреднување на работата во домот и на грижата за децата.
Во Вашингтон и Њујорк, најавени се протести за заштита на репродуктивните слободи, додека во Аргентина и Мексико денеска продолжува силниот крик на јавноста против убиствата на жени, под слоганот „Ниту една помалку“ (Ni Una Menos).
Ќе протестираат и жените во Авганистан под талибанскиот режим, кои најавија изрази на револт кои ќе се одржат во затворено, со барања за правата на образование и работа.