Министерството за внатрешни работи, МВР, воведува кодекс за облекување кој ќе мора строго да се почитува. Новите правила нема да важат само за вработените, туку и за сите граѓани странки кои ги посетуваат просториите на Одделот за граѓански работи.
Од МВР потенцираат дека соодветниот изглед е клучен за професионалното функционирање на државните служби.
Според соопштението, воведувањето на овие мерки е насочено кон подигнување на стандардите во секојдневното работење. Главните цели се:
Зачувување на угледот: Одржување на високиот професионален стандард и дигнитетот на самата институција;
Меѓусебна почит: Поттикнување на поголема меѓусебна почит помеѓу полициските службеници и граѓаните;
Подобра атмосфера, создавање соодветна работна средина и негување култура на почитување кон државните институции.
Од Министерството упатуваат посебен апел до сите граѓани кои доаѓаат во објектите на МВР за подигнување лични карти, пасоши, возачки дозволи или за кои било други административни услуги.
Се бара од странките да се погрижат нивниот изглед да биде пристоен и во рамките на општоприфатените норми кои важат за влез во јавни и државни институции, избегнување на несоодветна и премногу лежерна облека како шорцеви, папучи и сличн).
Овие правила не се однесуваат само на посетителите. Сите вработени во Одделот за граѓански работи добија задолжение доследно и без исклучок да го почитуваат веќе утврдениот кодекс за облекување кој е пропишан за државната администрација во рамките на Министерството за внатрешни работи.