Во Институтот за општествени и хуманистички науки – Скопје, денеска, со почеток во 18 часот писателката Елизабета Баковвска ќе одржи јавно предавање на тема „Женско писмо, qu’est-ce que c’est?“
Предавањето ќе се занимава со сфаќањата на концептот „женско писмо“, особено со неговата комплексност и апоричност. Притоа, од една страна, ќе се продискутира од аспект на тн. француска феминистичка теорија за овој поим, со разгледување на размислите на Елен Сиксу, Лис Иригаре и Јулија Кристева. Ќе се зборува и за т.н англо-американски феминистички приод.
На предавањето ќе се разговара и за одгласите на ваквите теории во македонската книжевна теорија и критика (Катица Ќулавкова, Јасна Котеска), за македонското женско писмо, меѓутоа и за некои аспекти на авто-перцепцијата и критичката рецепција на македонските авторки. Сувоста на теоријата ќе се разблажи со обиди преку неколку практични примери (извадоци од дела на македонски авторки) да се покаже возбудливата многузначност на женското писмо.
Елизабета Баковска е авторка која пишува поезија, проза, есеи и критички книжевни осврти. Повеќе години преведува, пишува и уредува во електронското списание за култура Блесок.
Предавањето ќе се одржи во новите простории за настава на Институтот, ул. „20-ти Октомври“ бр.8.